歐霸深夜場 馬體會食「魯」有難度

猪拉多纳

歐霸盃愈夜愈精彩，周五凌晨四點過後，歐洲五大聯賽名牌粉墨登場，上屆冠軍馬德里體育會、熱刺、紐卡素、里昂、慕遜加柏、史特加、拉素、國際米蘭一齊出擊，各路大軍卡士十足，勢必炮製連場好戲，你又點可以錯過呢，捱眼瞓睇天光都值得！

（周五4:05am 有線64及204台直播）

衞冕馬體會狀態、決心一般，主場鬥硬嘢魯賓卡山唔易啃！歐霸盃32強賽事，馬體會應照舊收起王牌法卡奧，攻力勢必減弱；魯賓卡山經驗夠分組賽不敗，馬體會於分組賽主場三戰都僅贏一球，今戰續捧「讓球和」。

馬體會上屆決賽三球輕取畢爾包勇奪冠軍，今屆衞冕態度唔算肉緊，教頭施蒙尼擺明將注意力擺於聯賽身上，分組賽六戰都冇出過法卡奧打正選，搵迪亞高哥斯達同阿祖安盧比斯攻堅。

分組賽三場主場，面對特拉維夫夏普爾、科英布拉大學同柏辛域陀尼亞，馬體會兩次贏1:0，一次贏2:1，今場對手實力更強，實在難大炒。
魯賓卡山唔係嘢小

魯賓卡山本季失意於俄超，但於歐霸卻有出色表現，分組賽4勝2和首名出線，而且剛購入法國中場馬維拿，球隊實力經驗兼備，今戰甚至有力一拼，故除「讓球和」外，可以兼買「讓球客勝」。