辛尼特紅軍嚴寒捱「細」界

猪拉多纳

俄羅斯辛尼特主場鬥利物浦，辛軍近兩個月冇踢過正式賽事，球隊明顯未在最佳狀態，首回合會採觀望態度。紅軍今戰會多派主力上陣，但於-2度嚴寒天氣下，作客亦會保守，揀細盤。

（有線61及201台周五凌晨1時直播）

揀波一睇陣容、二睇狀態、三睇鬥心，今戰雙方三樣都唔肯定，真係好惡揀。歐洲列強唔係隊隊都對歐霸盃有誠意，好似利物浦，本屆就絕大多數派副選敷衍，但紅軍於聯賽冇啖好食，本土兩個盃賽又已出局，依家剩番歐霸盃爭，兼遇上勁旅，預計領隊羅渣士會較肉緊，或派蘇亞雷斯、謝拉特及格連莊臣等上陣。但紅軍對歐霸始終唔太上心，兼且早前於聯賽不敵西布朗，匆匆再戰仲要去到嚴寒嘅聖彼得堡，戰果應如近兩次作客歐戰一樣，開出細盤。
辛尼特攤凍兩個月

辛尼特陣中擁有侯克、韋素及丹尼艾維斯等高質兵，但冇乜化學作用，於歐聯分組賽表現平平，目前於俄超僅排第三。最大鑊係當地聯賽正在歇冬，辛軍已有兩個月冇正式比賽，如今鬥個名仲嚇得吓人嘅紅軍，相信首回合亦唔會冒進。睇番個賠率，細盤得1.65倍，已經提晒大家點買。