車仔為面子大布復

猪拉多纳

歐聯小三降格歐霸

歐霸盃進入32強淘汰賽階段，八支歐聯分組賽三哥降格出戰，其中車路士、辛尼特及賓菲加等名牌球隊級數超班，而且同樣有心爭盃，今次歐霸第一擊嚴陣以待，誓要喺新春響頭炮！英超富豪球會車路士成為史上首支喺分組賽出局嘅歐聯衞冕球隊，帶住羞家紀錄轉戰歐霸盃，首戰作客捷克布拉格斯巴達殺聲震天。歐霸盃係車仔季內最實在目標，大軍爭冠決心大，但呢班波海鮮味濃，作客讓波擇使，佢哋今季盃賽作客八成以上開大，玩大盤最好！

（有線64及204台周五凌晨2時直播）

車路士自從改由賓尼迪斯領軍後勁有利物浦feel，踢得順無人能敵，衰起上嚟冇心冇力，好難捉摸。車仔失意歐聯、世冠盃同聯賽盃，喺英超又難望爭標，尚餘足總盃同歐霸盃有得爭吓，為免食白果，惟有將雞肋歐霸盃當歐聯，好向老細阿布拉莫域同班粉絲交代，隊長泰利已經叫班戰友醒醒定定做番齣好戲，唔好再失威。
布拉格斯巴達主場有攻力

車路士被視為歐霸盃冠軍熱門，陣內星光熠熠，淨計王子費蘭度托利斯身價已經高過對手成隊有找，由於射手丹巴巴亞曾代表紐卡素出戰歐霸盃唔符合上陣資格，王子會擔正攻堅，對住呢類歐洲三線球隊夠殺。車仔今戰仲有尼日利亞非國盃冠軍隊成員域陀摩西斯及約翰米基爾歸隊，中前場人腳完整，有本錢喪攻對手。

捷克聯賽要到月尾先重開，布拉格斯巴達上仗正式比賽係上年十二月，質素同狀態都唔及車仔，主場出戰預咗捱打。不過，佢哋喺分組賽主場三戰兩勝一和轟入七球，曾經戰勝西甲畢爾包，並非全無反抗能力。車仔近四次作客不勝，客勝熱而不穩唔抵玩，佢哋今季盃賽作客七戰六大，一於追多口大盤啦！