耶耶回歸 曼城有計

猪拉多纳

最強救星撐起雙箭

上季曼城奇迹稱霸英超，呢支億萬大軍家陣雖然落後曼聯9分，不過成班手足都仲雄心壯志，佢哋今晚造訪修咸頓仲有「救星」耶耶托尼回歸，做阿古路同迪斯高嘅「最強後盾」，對住「爛閘」嘅修咸頓唔難大開殺戒，曼城讓半一，要1.76倍上盤。

（有線200及300、廣東體育周日凌晨1:30直播）

曼城近期頻頻累捧場客損手，連續兩場聯賽失分畀昆士柏流浪同利物浦，足足被同市宿敵曼聯拋甩9分咁多。之不過領隊文仙尼依然未放棄，話曼城有能力贏晒剩餘嘅所有賽事，唔理佢係死撐定講堅，文帥口響成咁，睇怕今晚點都唔會第一鋪就衰啩！
高柏尼復操隨時候命

最重要係隨住科特迪瓦喺非國盃出局，托尼兄弟已經火速歸隊，有曾經効力「地上最強」嘅耶耶托尼喺中場派牌，條中場線肯定生番晒，咪忘記大衞施華同占士米拿呢排枕住踢翼都有貨交，腳風勁順嘅迪斯高同重拾狀態嘅阿古路唔愁冇供應。據曼城助教柏列尋日向《每日鏡報》透露，隊長高柏尼已經練番波，今仗有機會候命，難得齊章，曼城係時候做番齣好戲喇。
列基林拔主場唔識入波

冇錯，修咸頓自從由普捷天奴接手後鋒力強咗好多，近4場聯賽只係輸過畀曼聯，可惜「聖人」賽前收到唔少壞消息，除咗好波之人加斯頓拉美利斯續抖，兩位英格蘭U21成員尼達利基尼同勞基梳爾都打咗柴，左、右二閘未必出得，隨時畀曼城為所欲為。

可能有人話修咸頓Icon列基林拔近排好弗，或者會畀到麻煩曼城，係，呢位射手爭1球仲會成為「聖人」嘅「百球先生」添，不過比利翻查數據，原來林拔近5個入波全部都係作客，聖瑪利主場根本唔多旺佢，攻守兩瓣都信唔過，點計都係捧曼城正路！
藍月亮專恰弱旅

‧曼城近10戰對住排名第12位以下嘅隊伍，豪取9勝1和。

‧修咸頓前鋒列基林拔近8場英超入5球，呢5球全部都係作客入。

‧「聖人」射門中框命中率僅得40.2%，係英超20隊當中最低。