法蘭克福夠本錢攻「紐」

猪拉多纳

德甲法蘭克福主場迎戰紐倫堡，黑柴對強陣強勢嘅法蘭克福充滿信心，1.7倍主Ｗ係信心推介，進取可以捧埋2.88倍「讓球主勝」。

（周六晚10時30分開賽）

法蘭克福係今季德甲其中一支最令人驚喜球隊，而且仍受莊家低估，目前實際戰鬥力絕對在名牌嘅史浩克、慕遜加柏同雲達不來梅之上，現時排聯賽前四名十分合理。陣中主力包括中場美亞、新星門將奇雲查普、右閘施巴斯坦真格、中場施巴斯坦魯迪同派文舒維加名氣唔大，但計表現同實力足以躋身德甲一線球星之列。

法蘭克福過去兩個月經過艱難時期，皆因防線領袖安達臣蘇亞雷斯因傷缺陣，佢今季喺德甲共上陣14場，球隊取得9勝3和2負佳績，平均每仗只失1.28球，佢缺陣6場球隊輸咗4場，平均失球數字達2.16，呢位巴西中堅前仗傷愈復出，法蘭克福即連續兩場贏賀芬咸同漢堡，合共僅失1球，防線有番佢真係穩陣好多。而更利好嘅，係啱啱得到由禾夫斯堡外借箭頭拿傑，佢上仗首度登場即梅開二度，令法蘭克福解決埋欠缺正前鋒嘅最弱一環。球隊今季主場10戰7勝拍住拜仁同利華古遜，今晚主場夫添遇弱旅勝望甚濃。
紐倫堡主力剛遊飛機河

紐倫堡上仗主場贏慕遜加柏只靠法蘭特斯狡詐插水博到12碼，本身演出唔值得贏，佢哋係德甲平均年齡最大球隊，至今正選上陣嘅平均年齡達到28.58歲。今仗最不利嘅係兩大主力清武弘嗣同贊特拿啱啱返祖家分別代表日本同美國踢國際賽，尋日至搭長途機歸隊，體能狀態成疑，作客唔係法蘭克福對手。