季軍戰 馬里「+1」收爐

猪拉多纳

加納4強吃悶棍散晒

今屆非國盃進入尾聲，兩支喺準決賽喪師嘅馬里同加納，今晚於季軍戰作最後廝殺。與馬里喺四強畀尼日利亞大炒唔同，加納志切爭標，卻慘遭布基納法索頑抗，最終喺互射十二碼輸波，球員力疲心傷，仲邊有心機爭季軍呢？馬里可乘機偷雞，繼上屆之後再次擊敗加納成為三哥，受讓捧「讓球主勝」。

（now 676周日凌晨2時直播）

加納剛喺四強慘食布基納法索一記悶棍，被布軍扳平後死守至極刑大戰，消耗唔少體力，最終加納喺巨大壓力下有三人宴客，被拒諸於決賽門外，匆匆再戰，唔單止球員未回得切氣，賽後個個都喊到收唔到聲，大軍士氣跌至冰點，猶如洩咗氣嘅皮球，試問一支體能輸蝕、軍心低落嘅球隊，就算實力有幾勁都信唔過喇。
盼贏波鼓勵國民

馬里喺準決賽1比4大敗畀「超霸鷹」尼日利亞，只係技不如人，同加納輸唔抵相比，乃天淵之別，眾將心情冇乜點受到影響。其實馬里今屆能夠殺入四強，已經超額完成，不過該國飽受戰亂摧殘，球員都希望用勝利為國民帶來歡樂，隊長施度基達甚至建議撥出部分獎金幫助人民，鬥志遠勝無心戀戰嘅加納。況且馬里上屆曾勇挫「黑星」奪得季軍，今仗隨時歷史重演，馬軍有得受讓咁筍，梗係要「讓球主勝」。