射手回歸 維迪斯唔赦燕豪芬

猪拉多纳

喺南非舉行嘅非國盃已進入尾聲，唔少非洲兵都已經返回所屬球會報到，對荷甲維迪斯嚟講肯定係好消息，事關球隊缺少首席射手韋菲特邦尼成績的確有影響，今晚主場鬥燕豪芬有呢名科特迪瓦前鋒回歸，戰鬥力將大大提升，2.2倍「讓球主勝」有得諗。

（now 639周日凌晨3時45分直播）
撐NAC作客剝「牙」

韋菲特邦尼早前代表科特迪瓦參加非國盃，維迪斯踢咗3場聯賽輸兩場，不過其實兩次輸波都係作客，主場一役就曾反勝勁旅阿積士，表現絕對唔失禮，如今韋菲特邦尼回歸，更加唔驚燕豪芬。何況主隊另一射手莊拿芬里斯以前曾經効力燕豪芬，倒戈鬥志更濃，首循環碰頭，維迪斯就係憑呢對箭頭組合各建一功作客贏2比1。燕豪芬近兩場聯賽雖然狂入12球，但對手只係荷華高斯、海牙等弱旅，今次對手實力高好多，作客讓波唔穩陣，寧敲「讓球主勝」。

另外兩關都揀荷甲，海牙主場鬥NAC，海牙上場淨吞燕豪芬7蛋，信心難免受挫，對住歇冬後連贏3場兼冇失波嘅NAC，主隊讓平半捧下盤。最後格羅寧根主場鬥華域克，格羅寧根係荷甲入波第二少球隊，攻力疲弱，華域克作客踢法消極，捧細盤係正路之選。