修咸頓下盤慶新春

猪拉多纳

曼城近況曳 作客信唔過

踢波唔係好波就一定贏晒，有時狀態唔弗隨時失分。曼城今輪英超作客修咸頓，逐個秤梗係曼城高兩班波啦，但一班主將唔弗，而且分數又畀曼聯拋離，作客都幾惡搞；反而「聖人」換帥後好生猛，主場唔赦強敵，受讓半一捧下盤！

（有線300及200台周日凌晨1時30分直播）

曼城上季眾志成城，壓倒曼聯捧走英超錦標，唔知係咪爭標飢渴感稍減，加上於歐聯分組賽羞家出局，一班球星好似懶懶閒咁，戰鬥力明顯唔及上季。雖然阿古路上場對利物浦射入球世界波，但狀態只有上季7成，泰維斯更加唔見影，只有迪斯高保持水準。中場大衞施華亦靈光驟減，而耶耶托尼雖已踢完非國盃歸隊，但舟車勞頓咁辛苦，今場領隊文仙尼都未必畀佢踢正選。雖然隊長高柏尼或傷愈復出，但出得都狀態成疑，大有機會要繼續靠拿斯達錫拍尼史葛扼守中路，就算門將赫特狀態一流，呢條防線都難畀到細鬼信心。
普捷天奴成功過渡

修咸頓經過大半季磨練，已適應英超節奏，近8場聯賽佢哋只係作客輸過畀曼聯，對車路士、阿仙奴、愛華頓都唔使輸。其中主場鬥「拖肥糖」嗰場細鬼有做現場評述，佢哋打得有板有眼，無論攻守都有睇頭，已再唔係季初嗰隊「盲目烏蠅」，睇嚟新帥普捷天奴已快速成功過渡，相信「聖人」會愈踢愈好，主場受讓半一，真係要得過。