近26年對陣未輸過 法國讓「德」起

猪拉多纳

周四凌晨另一場重量級熱身賽，法國主場迎戰德國，法國自迪甘斯接手後變得四平八穩，連球壇王者西班牙都贏唔到佢哋。德國隊今次殘陣出擊，而且對上一次擊敗法國已經係26年前，讓球主客和德國讓1球，「讓球主勝」屬穩陣之選，平手盤亦可敲法國。

（now 714周四凌晨4時直播）
迪甘斯撥亂反正

法國隊於去年歐國盃8強出局後由迪甘斯接替白蘭斯執教後，6場國際賽唔計爆冷輸畀日本，其餘對烏拉圭、西班牙及意大利都保持不敗。法軍喺上兩次大賽都鬧出內訌醜聞，所以迪帥上任後即大肆整頓紀律，棄用拿斯尼、賓艾化、馬維拿等麻煩友，提升士氣及團隊精神。

另迪甘斯今次除徵召舊將賓施馬、列貝利、文尼斯外，仲選咗新丁雷恩中場阿歷辛迪尼，加上紐卡素一對孖寶穆沙施素高同卡比耶近況都弗爆，隨時可為球迷帶來驚喜。
德國六主力倦勤

德國近年可謂被法國隊剋死，對上一次於國際賽擊敗對手已經係87年嘅事，之後6次碰頭，德國錄得1和5負嘅劣績，最近一次對陣係舊年2月主場輸1比2，心理上好輸蝕。

而且德國傷兵眾多，拉素前鋒高路斯、拜仁中場舒韋恩迪加及多蒙特三虎馬高列奧斯、馬里奧葛斯及舒姆沙等6大主力全部唔出得，箭頭馬里奧高美斯近期喺拜仁又冇正選，狀態成疑，想打破26年不勝宿命絕不容易。