車仔踩油撞散喜鵲

猪拉多纳

接連失分谷埋一肚火

張峰囝囝Aiden出世至今，親朋戚友周不時問「會唔會畀Aiden做職業足球員呀？」好多朋友都會幫我答：「唔好喇！做球員無保障，前景又唔好！」記得十年前球市低迷，嗰時入職薪金好低，好多同齡球員相繼轉行，有部分當打球星仲要做兼職維持生計。但其實做球員係自己嘅興趣，所以有好多人仍然會堅持。而且球員空閒時間多，只要識利用鋪定路，踢波都係一份好工。所以「張峰」唔會反對囝囝將來做職業足球員。

今晚英超紐卡素主場迎戰車路士，「喜鵲」領隊柏杜喺1月一口氣簽入前鋒高法蘭、中場穆沙施素高、守將迪保治等5個球員幫手護級，又畀佢好彩，喺上仗贏到阿士東維拉，賽後柏杜即刻賣花讚花香，話新加盟嘅中場穆沙施素高表現好好，如果冇簽佢就贏唔到維拉喎。

不過計我話，仲要睇埋今晚對車路士先知囉，始終車仔三線結構緊密，加上佢哋喺聯賽盃4強出局，上場又畀雷丁逼和，要踢下屆歐聯就再冇失分空間，嚟緊一定踩行油搶分。咪忘記丹巴巴亞同桑馬達一路都咁勇，今晚全取3分應該唔難，信多車仔一次，撐1.77倍客勝啦！（有線200及300、廣東體育周六晚11:00直播）