緬恩斯折箭難敵拜仁

猪拉多纳

德甲頭場直播緬恩斯主場鬥拜仁慕尼黑，拜仁今季實力進一步提升，已成超級班霸，球隊喺防守同作客成績都有大幅改善，今晚作客面對近季宿敵緬恩斯必會打醒精神，加上主隊首席射手施沙拉爾停賽，拜仁更無後顧之憂，推介1.82倍「讓球客勝」。

（有線61及64台周六晚10時30分直播）
施沙拉爾停賽打擊大

緬恩斯喺少帥杜曹帶領下成績穩步上揚，目前已位列聯賽第5，杜曹過去領軍面對勁旅亦有一手，近3季主場對拜仁就贏過兩次，包括上季贏3比2，不過首席射手施沙拉爾累積5面黃牌停賽，呢位匈牙利箭頭今季已取得11個聯賽入球，佔球隊總入球超過四成，次席射手尼古拉梅拿同艾雲舒捷斯至今只各取得4球進帳，況且拜仁實力今非昔比，緬恩斯主場一向不擅守，今場鋒力嚴重受損，好難再做攔路虎。

拜仁喺失落兩季聯賽錦標後痛定思痛，今季增兵後演出同成績都大有進步，目前喺榜首已拋離次席利華古遜11分，球隊最大改善係防守同作客成績，至今19場聯賽僅失7球，9場作客更8勝1和未嘗敗績，球隊對聯賽錦標志在必得，趁歐聯未重開必盡力搶分確保優勢，箭頭文迪蘇傑處於佳態，加上近季作客緬恩斯屢吃苦頭，今晚絕對唔會輕敵。兩軍實力差距甚遠，拜仁只要正常發揮起碼贏兩粒。