熱刺鬧前鋒荒益晒諾域治

猪拉多纳

英格蘭足總盃第4圈賽事完結之後，按慣例會喺緊接嘅周中加開英超快車，近兩年亦撞啱冬季轉會市場關閉，一眾領隊都忙到不得了，會否影響備戰就不得而知，但投X人士一定要做好心理準備，就係你捧嗰隊隨時會全無先兆賣走主力，如果捱到眼瞓，就真係要等埋正選陣容曝光先好出手。
「金絲雀」足總盃留力博今鋪

喺剛完成嘅英格蘭足總盃賽事，夾埋有4支英超球隊被低組別球隊淘汰，究竟係有心放棄盃賽，抑或狀態真係唔掂，就真係要分得清清楚楚，就好似今晚碰頭嘅「金絲雀」同熱刺，剛戰齊齊輸波出局，演出無疑幾令人失望，但諾域治上仗基本上盡出副選，睇得出首要任務始終係護級，近期聯賽主場亦只係輸畀曼城同車路士兩隊前列分子，有權頂得住作客嘅熱刺。

反觀熱刺上仗就精銳盡出，最終不敵英冠嘅列斯聯，比起諾域治主場不敵非聯賽嘅盧頓更難令人接受，事實上熱刺近期繼續鬧前鋒荒，艾迪巴約要代表多哥踢非國盃，迪科爾就養緊傷，被迫將丹普西推前做正前鋒，鋒力難免受影響，作客讓半一信唔過。

（有線203及303周四凌晨3:45直播）
足球重心：諾域治（下盤）、富咸（勝）

馬膽推介：5場(1)天賦傳奇

上仗雖然全程守好位都要屈居第二，但頭馬「愛寶駒」喺周日尾場超強組賽事都所負不遠，證明「天賦傳奇」仲可以博多鋪，至少抵玩過上場蹄下敗將「衝線」同埋「環保戰士」。