阿仙奴搞唔掂紅軍

猪拉多纳

孤寒唔買人踢到殘

每逢轉會市場重開期間，班阿仙奴迷都食唔安坐唔落咁，因為睇見隊波問題多多，但班高層就始終按兵不動，真係急死班「廠迷」！今晚阿仙奴喺酋長球場迎戰近排喺英超愈戰愈勇嘅利物浦，今場有阿迪達因傷缺陣，睇怕都要承受遲遲唔買人嘅後果，就算主場出擊都無把握贏波啦，紅軍1.6倍「讓球客勝」玩得過！

（有線201及301、廣東體育周四凌晨3:45直播）
阿迪達因傷缺陣

阿仙奴領隊雲格出名精打細算，次次都要去到轉會市場臨閂門先至出手。佢唔肯花錢買球星已令人失望，Last一刻先有動作博執平貨，就更加要冒住乜人都買唔到嘅風險。阿迪達養傷中場無咗支柱，戴亞比似攻擊球員多過防中，依家防中呢個位唔買人點搞呀？

除咗防中外，箭頭亦係要補強嘅位置，禾確特改踢最前仍然要時間適應，普多斯基同基奧特表現唔穩定，有傳兵工廠希望簽巴塞隆拿前鋒韋拿，可惜遠水夠唔到近火，後備兵源不足個個踢到殘，雖然隊長華美倫趕及復出，但今場仍然係危機四伏。

利物浦季初表現都係令人失望，但自從高價簽入史杜列治後，成隊波即刻爽晒，喺英超愈踢愈好。蘇亞雷斯加史杜列治呢對前鋒組合又快又怪，一般後防球員真係好難睇得實佢哋。既然紅軍上場足總盃輸畀奧咸出局咁失禮，今場必定踢番爭氣波補飛，作客就算攞唔到3分都好大機會保住1分，「讓球客勝」好穩陣。
頂占筍盤：利物浦（讓球客勝）