|
皇馬失5正選 難擋美斯
西班牙盃4強爆發國家打吡!皇家馬德里今晚首回合先喺巴拿貝球場再鬥巴塞隆拿,係今季「Round4對決」,雖然對上3次交手皇馬只輸過1次,但今場佢哋有5個主力缺陣,C朗仲可能要紮住頂硬上,撞啱巴塞有美斯進入瘋狂狀態,客讓平半撐得過!
(now632台周四凌晨4:00直播)
皇馬拉莫斯 迪馬利亞停賽
就算唔當左閘法比奧干查奧係主力,除咗後衞比比同門將卡斯拿斯養傷,皇馬仲有翼鋒迪馬利亞同中堅沙治奧拉莫斯停賽,讓足5件點打?雖然賽前C朗口硬話,唔會因為幾個隊友缺陣怕咗巴塞,仲話會全力應付呢場世界上最難打賽事,之不過,日前皇馬喺聯賽以4:0大勝基達菲佢整親,係咪仲救到皇馬呀?
或者上場連中三元嘅C朗,足踝傷勢唔算好嚴重,但迪馬利亞係佢好拍檔,假如今場C朗冇咗佢唔夠供應,好可能又會玩英雄主義不斷單打獨鬥,甚至忍唔住連環浪射,要真正威脅到巴塞大門,真係唔容易。就算計埋西超盃,皇馬今季對巴塞有1勝1和1負都唔抵撐。
巴塞維蘭路華遙控領軍
另一方面,巴塞教練維蘭路華要去紐約接受癌病治療,事先將揚唔會親自領軍,但助教勞拉就話,其實由排陣同臨場調動,維蘭路華都會遙控指揮,嗌大家唔使擔心。當然啦,巴塞日前以5:1大勝奧沙辛拿,美斯食出大四喜順到勒唔住,都係值得大家追捧巴塞嘅原因,更何況淨係計近3次交手,佢已經攻入皇馬4球!
仲有呀,巴塞對奧沙辛拿收起恩尼斯達、碧基同佐迪艾巴,擺明留力,既然巴塞已經喺聯賽有11分榜首優勢,兼且放甩皇馬15分,絕對有條件喺西班牙盃用強陣應戰,加埋有射手韋拿、翼鋒阿歷斯山齊士同中場法比加斯可以調動,今場巴塞作客讓波唔過分,信美斯就玩上盤!
國家打吡6連大
‧近6次對賽全部開大。
‧巴塞連續5場有失球。
‧皇馬近6場只失1球。
‧巴塞近10戰有6場美斯先入波。
信往績博好分半場大
皇馬今場無咗「聖卡斯」為首嘅後防鐵三角,巴塞亦連續5場失波,兩隊防守都信唔過。翻查往績,近4次皇馬主場對巴塞,有3次半場已至少出現2個入波,嫌1.48倍大冇肉食,不如轉捧2.13倍半場大。
西盃賽制
採主客兩回合淘汰制,今輪為4強首回合,若總比數相同,作客入球較多一隊晉級,再和則於次回合後加時作賽。若加時入球數字相同,客隊憑作客入球優惠晉級,若加時沒有入球,則互射12碼決勝。 |
|