熱刺殘陣讓波啃唔「諾」

猪拉多纳

英超周中進行快車檔期，諾域治將於主場對熱刺。純計人腳質素熱刺當然喺諾域治之上，但慘在熱刺兩名射手艾迪巴約及迪科爾都缺陣，今場好有可能要用到美國中場丹普西擔當入球重責。熱刺鋒力銳減兼要作客，爭勝條件不足，讓波當然捧唔過，巨高今場一於揀受讓嘅諾域治「讓球主勝」。

（有線303及202台周四凌晨3時45分直播）

熱刺雖然近況唔差，之不過領隊保亞斯正為今仗排陣而頭痕，事關前鋒艾迪巴約因參加非洲國家盃而無法為熱刺比賽，另外首席射手迪科爾又因傷未能上陣，入球本錢即時大減。本來熱刺仲有個前鋒哈利卡尼，但呢位後生仔已經外借到今場對手諾域治嗰邊，依家熱刺缺乏正宗攻擊球員，相信保亞斯焗住將進攻中場球員丹普西推前頂住先。
諾域治主場搶到分

熱刺今場殘陣出擊，攻力必定大打折扣，作客贏波有一定難度。「金絲雀」諾域治今季喺英超及聯賽盃已曾兩度對戰熱刺，兩場比賽諾域治都保持不敗，可見呢隻雀對住熱刺特別有心得，深信主隊今場有力再取分數，受讓之下可捧「讓球主勝」。