巴塞「大」鬧皇家禁地

猪拉多纳

趁艦隊用次貨護甲

周四凌晨爆發西班牙國家打吡，兩大宿敵皇家馬德里同巴塞隆拿，喺西盃4強首回合交鋒。兩軍球王基斯坦奴朗拿同美斯射術精湛，C朗更加喺過去8次國家打吡中有7仗攻破巴塞大門，今仗「銀河艦隊」主場出擊，當然要喺主場球迷前數胡，但球隊有卡斯拿斯在內嘅4名主力傷停，面對進攻水銀瀉地嘅巴塞，皇馬條後備防線都幾惡頂，雙方碰頭例演入球騷，入球大實屬不二之選。

（now 632周四凌晨4時直播）

堪稱「一時瑜亮」嘅C朗同美斯，剛過去聯賽又發威，一個食出大三元，一個仲大四喜添，喺地球真係好難搵到守將嘜實佢哋。特別要留意嘅係C朗，佢喺國家打吡踢得特別醒神，過去8次對住巴塞有7次有波入，合共入咗8球，所以唔使擔心C朗畀巴塞嘜死入唔到波。
C朗國家打吡醒神

至於美斯對皇馬入波就比較少，過去7次國家打吡只有3仗有波入，合共入4球。不過，巴塞最強之處唔係美斯，而係整體合作，當美斯入唔到波，仲有柏度洛迪古斯、沙維、法比加斯同恩尼斯達，甚至後上嘅碧基都有士哥能力。

此外，皇馬原本已有中堅比比因傷要抖成個月，上周中西盃8強作客華倫西亞，門將兼隊長卡斯拿斯勇戰左手斷骨，起碼要缺陣兩個月，代替佢嘅阿丹甩漏多多，同隊友又唔夠默契，勢必成為防線嘅計時炸彈，就算剛有前青訓產品迪亞高洛迪古斯回巢，但呢位門將今季喺西維爾長坐冷板，狀態成疑，真係用邊個都唔穩陣。

由於左閘法比奧干查奧及快翼迪馬利亞對華倫一役領紅，今仗需要服刑，皇馬4大缺陣主力中，有3個係後防重心，隨時畀巴塞打到穿晒窿。巴塞攻力毋庸置疑，最近重新將恩尼斯達推前任左翼，佢經常同美斯、法比加斯喺左路眉來眼去，威脅極大，上圈對馬拉加，連中堅碧基都變身中鋒取得士哥，面對唔齊腳嘅皇馬防線，更加肆無忌憚。