QPR破「城」搶分

猪拉多纳

球星上晒力遇強愈強

今個周中英超又開快車，今晚就有場昆士柏流浪主場對曼城嘅豪門大戰。QPR今季雖然大灑銀紙買人，但季初成績勁差，好在由夏利列納接手後重返正軌，幾個星級球員更發揮威力，依家呢支巨人殺手真係有本事搞到衞冕嘅曼城頭痕，搶分護級唔係奢望，小弟今場決定捧2.55倍「讓球主勝」。

（有線200及300、廣東體育周三凌晨3:45直播）
昆士柏新兵雷米有料到

QPR班球員質素絕對唔差，但唔知點解季初畀曉士帶到潰不成軍！正所謂「窮則變、變則通」，球會及時搵夏利列納接手就愈踢愈好，近3場聯賽有1勝2和未輸過！佢哋今季有鋪遇強愈強癮，今季兩戰車路士有1勝1和，上仗主場亦同熱刺打成平手，絕對唔好恰。

最重要係，依家QPR班星開始上力，新加盟嘅法國國腳雷米上場聯賽首次披甲就即刻有入波，證明無入錯貨。但最令小弟印象深刻嘅反而係巴西門將施薩索拉斯嘅世界級表現，有佢把關近3場聯賽只失1球，QPR大門無憂！而且即將去美職教波嘅賴恩尼爾遜踢埋今場先走，佢肯定搏晒命留個美好回憶啦！
曼城冇耶耶托尼擇使

曼城雖然係上季英超冠軍兼家陣排緊第2位，但今場有攻守兼備嘅中場大將耶耶托尼踢緊非國盃缺陣，曼城無咗佢踢作客波係差咁截，加上前鋒泰維斯又跌落入球荒，鋒力唔多靠得住，今場就算失分都唔出奇呀！
QPR半場11戰不勝

‧昆士柏今季英超主場未試過半場領先，11場錄得5和6負。

‧曼城11場英超作客合共開出7次「半場和」，其中5次為「0:0」波膽。

‧雙方近10場聯賽同樣開出4大6細。
兩隊鬥慢熱博半和

昆士柏流浪今季英超11次主場出戰雖然未試過領先，當中只得5次「半和」同6次「半輸」，但自從夏利列納接手後，佢哋嘅聯賽表現確實係穩健咗，今晚遇上作客慢熱、11場聯賽開出7次「半和」嘅曼城，2.35倍「半場和」值敲！
頂占筍盤：昆士柏流浪（讓球主勝）