布基納法索抵「贊」

猪拉多纳

今晚非洲國家盃上演C組最後一輪賽事，焦點集中喺布基納法索對贊比亞，兩隊角色互換，上屆冠軍贊比亞失去「神奇力量」，瀕臨出局邊線，想谷都有心無力。反觀原本被視為「魚腩」嘅布基納法索搖身一變成為異軍，演出如有神助，今仗和波都可以出線，形勢佔上風，有得受讓平半，必捧下盤。

（now 676周三凌晨1時直播）
贊比亞洩氣谷唔起

贊比亞上屆爆大冷奪得冠軍，但話明係爆冷，多數可一不可再，相隔一年就由天堂跌回凡間，踢兩場都未開齋，上仗如非球證末段誤判十二碼，可能已輸畀尼日利亞。贊比亞足球根基不足，大部分球員留喺非洲聯賽搵食，人腳質素參差，想取得佳績，往往靠打士氣。佢哋今屆開局唔順，睇怕只會每況愈下，就算今場急需搶三分至可以晉級，都未必谷得起鬥志。

布基納法索上屆分組賽三戰全敗出局，但今屆判若兩隊，首仗補時4分鐘逼和尼日利亞，固然有運，但上仗大勝埃塞俄比亞4比0，充滿說服力，甚有上屆贊比亞嘅影子，話唔定會創造另一個神話。布基納法索今仗和波都可以出線，球隊今屆一帆風順，兼有得受讓，當然要繼續追。

同組埃塞俄比亞對尼日利亞，尼日利亞贏波就肯定晉級，今仗必然搶韁，埃塞俄比亞背水一戰，更加會進取求勝，屬於駁火格局，捧入球大。