西維爾上力 打殘格蘭納達

猪拉多纳

西甲獨腳戲，西維爾擔大旗！西維爾上仗喺西盃炒薩拉戈薩4:0入4強，新帥埃默里終於開齋，家陣班波士氣爆燈，今晚喺主場迎戰CF格蘭納達，有條件再大勝一場，「讓球主勝」有2.02倍，抵玩！

（開賽時間︰周二凌晨4:30）

喺新任教練埃默里上任後，西維爾已經保持3場不敗，睇得出呢位教頭堅有料到。冇錯，雖則話西維爾入咗西盃4強，嚟緊周中又要硬撼馬體會，不過呢班波向來對歐霸盃情有獨鍾，依家佢哋仲有權爭來屆歐戰入場券，使乜驚佢哋會留力？
尼格度上仗入2粒返晒嚟

再講，西維爾班底不嬲唔差，中前場尼格度、捷西斯拿華斯、雷恩斯、拿傑迪錫全部都係好波之人，只要發揮正常，等閒球隊根本唔係佢哋嘅對手。尤其係射手尼格度，呢位西班牙國腳開季嗰陣狀態麻麻，上仗佢終於全面回勇連入2粒，搵番對射門鞋，今晚隨時又係佢騷「哥利」之時。係，你可能會話門將迪亞高洛迪古斯離隊轉投皇馬，影響到西維爾防線嘅穩定性，不過另一位門神、隊長柏立一樣經驗老到，根本唔使擔心。
格蘭納達近11場作客都失波

另邊廂CF格蘭納達最近表現唔差，不過值得留意嘅係佢哋連續11場作客都有失波，排喺第17位唔係冇原因o架。最重要係佢哋今晚仲要讓埋車馬，前鋒達雲馬捷斯、艾亞比、中場法蘭列高、丹尼賓尼迪斯、米基爾列高全部唔踢得，對住氣勢如虹嘅西維爾，準備抬蛋都得咯。