加納數爆尼日爾

猪拉多纳

搶B組首名走線避大象

非國盃B組進行最後一輪分組賽，榜首加納對包尾大幡尼日爾。加納足總要求極高，上屆非國盃入唔到決賽都炒教頭，今次矛頭仍然直指冠軍，為免同「大象兵團」科特迪瓦一齊喺上線，主帥艾卡華斯艾比亞實落柯打叫球員搏殺爭首名，今仗有力大炒弱旅尼日爾，要「讓球主勝」！

（now 676周二凌晨1時直播）

加納曾四奪非國盃冠軍，但最近一次捧盃要追溯到82年，距今足足21年。加納以非洲頂級球隊自居，喺洲內賽事目標定得好高，上屆於非國盃四強畢業，塞爾維亞籍教頭哥蘭史提芬奴域馬上被落鑊，前車可鑑，現任教頭艾卡華斯艾比亞必定不敢怠慢。加納今屆最強對手係「象國」科特迪瓦，「象國」晉級後處於上線，加納要奪B組首名先可以避開強敵。
馬里死火讓波捱「細」界

今屆加納唔算齊腳，艾辛、蒙達利、奇雲保定同阿休兄弟等猛將都唔在陣，唔少朋友擔心班波會走樣。不過，加納勝在大把兵用，安蘭同卡華禾艾沙姆都係非洲頂級中場，射手基恩去咗阿聯酋搵食射術冇退步，大軍分組賽兩戰一勝一和暫居榜首，今戰對住同組最弱嘅尼日爾優勢明顯，但絕對唔敢托大，只要發揮正常水平，贏兩粒唔成問題。

同組另一戰剛果民主共和國對馬里，睇排名馬里高出一大截，級數似乎較高，但現時人才凋零，只得前巴塞隆拿中場施度基達較具分量，其餘球員冇乜邊個擔到大旗，佢哋分組賽兩戰加埋僅入一球，鋒力疲弱，今戰讓波靠唔住，玩入球細較穩陣。