熱刺忙碌焗吔魚生粥

猪拉多纳

自從小妹投身社會後，發現啲時間真係好唔夠用，又要返工又要讀書，要兼顧咁多嘢真係唔易！熱刺領隊保亞斯都有呢個煩惱，佢哋依家喺英超排第4，又要踢歐霸盃，家陣仲要玩埋足總盃添，少啲體力都唔掂。小妹雖然知熱刺質素高列斯聯一大截，不過都寧願博佢哋小勝，撐3.55倍「讓球和」。
列斯聯話明死守

以往當列斯聯仲喺英超打滾嘅時候，都算係一線勁旅，不過今時唔同往日，近年列斯聯喺英冠同英甲徘徊，呢班波家陣喺英冠只係排第12，實力根本唔強，上次聯賽盃喺主場對車路士，都要被人大炒5:1，就知佢哋冇乜料到。正因為咁，列斯聯今鋪話明會屯重兵死守，加上對手換上實力不及車仔嘅熱刺，應該唔會再重蹈大敗覆轍。

熱刺狀態相當唔錯，連埋足總盃計，佢哋已經錄得8戰不敗，上圈足總盃仲喺主場輕取高雲地利3:0添。講真，熱刺班中前場質素真係勁高，射手迪科爾、左翼加里夫巴利都係獨當一面。不過咁，以盃賽專家保亞斯嘅穩陣作風，今晚點都係只求晉級不求大炒，始終熱刺既要爭歐聯席位、又想拎埋歐霸盃，以佢哋嘅兵源，靈活變通先係最緊要，小妹一於扒冷，博個熱刺「讓球和」啦！
推介：熱刺（讓球和）

微博傳情：好同事，加油呀！

上星期五同班同事食Farewell Lunch，真係有啲唔開心！正當同大家開始熟落，我就要離開batch 1301依個大家庭，好唔捨得！不過人望高處，我轉工後已為自己訂下一個5年目標，各位舊同事，你哋嚟緊嘅考試都要畀心機，一齊加油啦！