門將見高低漢堡打吡戰秤先

猪拉多纳

德甲早場上演北部打吡，漢堡主場對雲達不來梅，呢個對賽組合係德國除史浩克同多蒙特嘅魯爾區打吡外最矚目打吡對決，漢堡目前無論狀態、球員質素同戰術體系都優於不來梅，加上客軍今仗陣容不整，Oliver深信漢堡可以贏波，平手盤主隊1.8倍固然穩陣，進取捧2.28倍主勝。

（有線61及201台周日晚10時30分直播）
不來梅美亞列斯水皮

今仗係兩軍喺德甲第98次對決，回首歷史，漢堡同不來梅喺1983年嘅對壘最風光，雙方喺聯賽爭霸鬥到最後直路，漢堡憑得失球差壓倒不來梅封王，時至今日雙方都風光不再，但以目前兩軍狀態衡量，漢堡明顯在升勢中，相反不來梅就每況愈下。喺Oliver眼中，今場雙方最大分野係門將，漢堡嘅艾達係今季德甲表現最出色守門員之一，成功撲救率達到75%，相反不來梅門將美亞列斯無論觀感同數據都最差，撲救率只得59%，就算大家互相搏拳一人射一腳，不來梅最後一關欠穩都蝕底晒。

漢堡喺雲達華治回歸後重新搵到靈魂，教練芬克安排戰術同用人都令人信服，第二前鋒孫弘民表現搶眼，至於箭頭魯迪尼夫斯喺適應德甲節奏後愈踢愈進步，雖然腳下功夫麻麻，但擅長用最簡單嘅方法幫助球隊入波，難怪佢加盟漢堡前多次成為波蘭甲組聯賽神射手；至於不來梅痛失經理K阿羅夫斯後，喺收購球員同球會管理方面出現混亂，喺頑固教頭舒哈夫堅持主攻下，防線不穩問題無法解決，從上仗主場慘遭多蒙特血洗所見，球員鬥志同精神面貌都甚差，今仗兩大主力肯特同阿拿奧杜域都受傷患困擾上陣成疑，作客漢堡難樂觀。
Oliver 推介：

漢堡平手盤★★★★★

漢堡大★★★

拜仁慕尼黑讓球勝★★★