皇馬早場打爆「基」

猪拉多纳

晚飯時間開波冇失過拖

今晚西甲早場皇家馬德里主場對基達菲，變成為「寸王」莫連奴慶祝50大壽嘅生日派對！「銀河艦隊」雖不斷傳出內訌醜聞，但經過三鬥華倫西亞後，球員表現愈戰愈勇，適逢教練莫連奴昨日50歲牛一，眾將點都要送番份大禮畀佢老人家賀壽，何況皇馬上季兩次踢早場共轟十粒，面對近八場未嘗一勝嘅基達菲可予取予攜，「讓二球」照捧「讓球主勝」，大家扒住飯等睇C朗數胡喇！

（now 632周日晚7時直播）

皇馬內訌問題愈演愈烈，甚至傳出包括C朗在內，有七名球員逼宮高層要今夏解僱教練莫連奴。
補祝莫連奴50大壽

當然，如果想會長皮里茲聽你支笛，球員們點都要喺場上交足貨，近三仗惡鬥華倫西亞取得兩勝一和，尤其上周中西盃八強次回合打和1比1之役最兇險，喺門將卡斯拿斯中途傷出、法比奧干查奧同迪馬利亞被逐劣勢下，面對「蝙蝠兵團」一浪接一浪嘅進攻，皇馬眾將忘記疲倦、團結一致頂到完場，非常抵讚。咁蹺昨日係主帥莫連奴50歲生日，皇馬眾將一定識做，嚟一場大勝同佢補祝。

相反，昔日「豪門豬頭骨」嘅基達菲，今季失去以往韌勁，近八場正式比賽只錄得五和三負，連弱旅CF格蘭納達都贏唔到，球員信心處於最低點。況且基軍續有拿菲達、文尼、柏度李安因傷倦勤，摩洛哥新星巴拉達出征非國盃，殘陣出擊更難偷雞。

皇馬上季試過喺早場大炒奧沙辛拿七個一皮、豪派三蛋畀西維爾，證明早起踢波更醒神，加上嚟緊周中西盃四強硬撼巴塞，搵沉到爆嘅基達菲祭旗壯聲威就最啱，今場「讓二球」都冇有怕，直取「讓球主勝」。