紅魔盃賽策略：小勝就夠

猪拉多纳

今周由英總第4圈孭飛，尾場有曼聯主場迎戰近況麻麻嘅富咸。上圈紅魔對韋斯咸雖然出副選，但一落後就派尹佩斯搏殺，可見費Sir都算有心爭足總盃。不過咁嘅陣容，想曼聯大捷都幾難，倒不如博佢哋小勝一球開3.8倍「讓和」仲好。

（now633及660台周日凌晨1:30直播）
富咸防線穩少大敗

曼聯鋒力強橫，聯賽更不時大勝對手，不過大家咪因為咁被佢哋呃到。事關紅魔上季就係因得失球差冇咗個錦標，費Sir唔想重蹈覆轍，先叫班手足「盡做」，但一場過嘅盃賽就唔同玩法，曼聯今季喺盃賽贏咗6場波，當中就有5仗係小勝一球。就算上圈重賽對韋斯咸，曼聯喺主場早段入波一樣收晒油，今戰亦未必會大炒富咸。咪忘記富咸防線有軒治蘭特等猛人壓陣，好少大敗，鋒線又有貝碧托夫等反擊，估計出部分副選嘅紅魔但求穩打穩紮，小勝出線就收貨。