科特迪瓦錫身獻「細」

猪拉多纳

手揸3分唔使贏突

非洲國家盃D組第二輪賽事，重頭戲科特迪瓦對突尼西亞，上屆亞軍科特迪瓦陣中星光熠熠，但落到場比賽唔多對辦，好大程度因為歐洲球季正值季中，呢班球星難免比較錫身，以免受傷打爛飯碗，不宜高估。突尼西亞自知弱勢，應會打穩陣波，攞到一分都達標，隨時悶戰一場，捧入球細。

（now 676周六晚11時直播）

科特迪瓦上仗險勝多哥2比1，整體演出比預期差，射手杜奧巴威脅力亦大不如前，相信係因為中超已收咧一段日子，佢缺乏比賽之下，導致狀態不足。有傳杜奧巴想今個月重返歐洲搵食，喺呢個關鍵時期，更加唔想受傷破壞大計。其他主將亦有類似顧慮，擔心受傷無法向米飯班主球會交代。既然科軍已有三分在手，今仗亦唔需要太進取，贏波固然好，唔輸亦冇壞，唔好期望佢哋會強攻對手。
阿爾及利亞死火讓唔起

突尼西亞以本土聯賽球員為主，質素參差，上仗踢到補時先至入波，小勝阿爾及利亞1比0，攞到三分算好彩。預料佢哋唔敢喺科特迪瓦面前也文也武，應會打「擦鞋仔波」，加強防守打突擊，或形成膠着局面，加上雙方過去六次交手五次開細，值得再追。

同組阿爾及利亞對多哥，阿軍實力唔高得過對手，而且攻力差，近三戰冇波入，竟然仲要讓平半，力撐多哥下盤。

（now 676周日凌晨2時直播）
魔獸34點都爭啲

杜奧巴在首仗以隊長身份上陣，不過呢位前車路士球星表現麻麻，領隊林武治以荷甲維迪斯新星韋菲特邦尼入替佢。「魔獸」表現未達預期，相信與年紀有關，始終杜奧巴已經34歲，體力及衝刺力都唔及以前咁強，加上中國與南非氣候有好大差別，杜奧巴可能要花上更多時間去適應，期望今場對住突尼西亞，杜奧巴休息過後會有更好發揮。