利華狼吞弗賴堡

猪拉多纳

食私房菜打底保二哥位

經過漫長歇冬期，德甲前列球隊嘅表現一啲都冇走樣，榜首三雄拜仁慕尼黑、利華古遜同多蒙特喺上周聯賽重開都相繼贏波。今個禮拜「二哥」利華古遜將會作客弗賴堡，利華為咗繼續進逼榜首拜仁，就算作客都搏殺，今場馬會開出平手盤，一於撐利華古遜！

（有線61及201台周日凌晨1時30分直播）

弗賴堡今季表演不俗，暫時排係聯賽榜第6位，主場亦有一定威力。不過，佢哋喺自己地頭迎戰強隊時，成績往往差強人意，之前對拜仁同多蒙特都輸波，更未能取得任何入球，亦曾輸過畀雲達不來梅，加上弗賴堡近四次主場迎戰利華古遜全部輸晒，失咗10球而入球只得1粒，甚有「格食格」味道，今場弗賴堡仲有中場主力馬基亞迪因踢非國盃而缺陣，想贏？難啲囉！
傑斯寧舒賀爾尼着火

反觀利華古遜中前場主力傑斯寧同舒賀爾尼繼續入波唔停，上場主場輕取法蘭克福3比1後，暫時仲落後榜首拜仁9分，雖然要追上有啲困難，不過為保歐聯資格，同時亦要提防多蒙特同史浩克04等後上發力，所以點都要畀啲心機保住優勢o架嘞！

另外留意嘅係，第4位嘅法蘭克福同第15位嘅紐倫堡之間只得9分差距，可見今季德甲競爭形勢相當激烈，所以利華要保住三甲位置，餘下賽事不容有失，難得對手弗賴堡係「私房菜」，利華肯定以全取3分為目標，平手盤又點可以唔捧場？
Wendy推介

利華古遜　平手盤