紅魔遊完埠再煲魚生粥

猪拉多纳

英格蘭足總盃第四圈尾場由曼聯主場迎戰富咸，嚟緊周中英超會開快車，主帥費格遜必留有一手，隊內將士啱啱去完中東集訓，返到英倫要重新適應嚴寒天氣，結合佢哋今季盃賽主場慣性煲魚生粥嘅特點，一於冷敲「讓球和」！

（now 633及660周日凌晨1時30分直播）
韋費特沙夏今夏加盟

曼聯賽前公布好消息，水晶宮翼鋒韋費特沙夏落實今夏加盟，轉會費據報為1,500萬鎊（約1億8千萬港元），只要當地時間周五晚通過體測便可完成交易。講番場波，紅魔鬼趁住周中空檔期拉大隊去多哈集訓兼避寒，唔使凍到雪條咁練波，梗係舒適啦，但返到英倫天寒地凍，點都要花多少時間適應。費Sir坐擁大批兵馬，盃賽主場戰富咸何需精銳盡出呢，今戰預期由拿尼、路爾斯安達臣及查維亞靴南迪斯等二線兵擔正，最令人擔心始終都係後防，若果用阿歷山大畢拿同基斯史摩寧等後生仔難保不失。
富咸hea碧倒戈有睇頭

另一邊廂富咸則有箭頭貝碧托夫首次倒戈，「hea碧」効力曼聯後期被老費冷落，心存恨意，今次掉轉槍頭必定分外落力，呢個射手始終有級數，不得不防。有個數據極具參考價值，「紅魔鬼」今季主場盃賽五戰四勝一負，四場勝仗全部贏一粒，贏來點到即止，唔會浪費氣力，今場都係小勝格，冷博「讓球和」，熱捧入球大，博雙殺！