巴塞搶攻 半場大抵博

猪拉多纳

想晉級入2粒先穩陣

喺西班牙盃陷出局邊緣嘅巴塞隆拿，今晚8強次回合作客再鬥馬拉加非勝不可，韋拿拍美斯嘅巴塞鋒線肯定一開波就搶攻，撞啱馬拉加鋒力唔弱，半場入2球或以上唔難，「半場大」值得捧場！（now632台周五清晨5:00直播）

巴塞首回合喺主場出擊，竟被馬拉加完場前逼和2:2，由於計算作客入球，巴塞想晉級，今晚贏波當然最穩陣啦，如果和波的話，2:2都仲要踢加時，0:0同1:1就玩完，簡單嚟講，即係佢哋今晚一定要喪入波，至少入夠2粒囉，仲使驚佢哋Hea踢算數咩？特別係傷愈復出嘅韋拿，想喺冬季轉會窗搵到新班落，今晚絕對係「騷哥利」嘅大好時機，以佢嘅質素，入1、2粒係最低消費啦！
馬拉加沙維奧拿復出

「地上最強」近排除咗有韋拿好番，就連養傷8個月嘅新人王艾錫古恩卡都已正式復操，日前練波嗰陣，巴塞終於「豪取」今季首次集齊25位一隊成員操練，士氣冇得彈。至於話主帥維蘭路華飛咗去紐約醫病，頂替嘅助手勞拉梗係唔想孭鑊做出局罪人，班球員同佢關係唔差，今鋪梗會幫手，要巴塞開出近6場嘅第5口「半場大」，機會絕對樂觀。

馬拉加呢邊，能夠踢歐聯踢得有聲有色，實力當然唔簡單，上星期兩鬥巴塞有1和1負入3球，唔失禮o架。目前形勢，佢哋只要多入1球，巴塞就至少要入2球先有價講，應該都唔會打守勢波咁蠢。咪忘記阿根廷箭頭「野兔」沙維奧拿又係及時傷愈，可以填補伊斯高嘅空缺，鋒力一樣勁。呢場波個全場大得1.43倍，認為兩軍會大手交易嘅朋友，梗係博2.05倍「半場大」仲好啦！

首回合：馬客和2:2