C朗爆發天使回勇

猪拉多纳

撐皇馬三殺華倫

回勇「天使」救皇馬！今晚皇家馬德里喺西班牙盃8強次回合迎戰華倫西亞，「艦隊」雙翼迪馬利亞同C朗咁鬼弗，小妹梗係撐皇馬9日內連續3次生擒「蝙蝠軍團」，繼續派多幾隻蛋啦，一於捧2.62倍「讓球客勝」啦！（now632台周四凌晨4:30直播）

迪馬利亞上仗對華倫大爆發，各位「艦躉」睇到佢2個入球、1次助攻嘅精彩表現，怕且都會鬆一口氣喇！查實呢位阿根廷快翼好慘o架，自上年12月以來，佢顆粒無收之餘，表現仲備受批評添，結果喺2013年頭4場比賽有3次做後備，被「寸王」打入冷宮！依家好啦！「天使」終於一吐烏氣，日前佢受訪嗰陣，聲稱會繼續用精彩演出令批評者「收口」，迪馬利亞回勇，對C朗、希古恩等前線球員嚟講，簡直係「天使重臨」。皇馬助教卡蘭卡仲幫到出面，話迪馬利亞已經衝破心理障礙，今晚肯定會成為「蝙蝠軍團」嘅心腹大患喎。
早兩日作客炒蝙蝠兵5粒

核心人物C朗點勁就唔使多講，可能係受咗失落金球獎同畀莫連奴鬧爆嘅「雙重刺激」啩，C朗踏入2013年入球停不了，迄今為止已經喪入7粒，誓要同美斯爭做今年「入球王」，今晚難得再對私房菜華倫，梗係會繼續搏命數胡啦！講到底，小妹見皇馬終於冇受內訌影響，真係好開心，上場佢哋以5:0炒起「蝙蝠軍團」，仲獲球評家選為今季踢得最好嘅一場波添，今晚只要保持水準，絕對有機會煮多味「蝙蝠炒蛋」o架！
蘇爾達杜腳傷或紮住上

華倫西亞近2場夾埋吞咗皇馬7隻光蛋，要喺咁短時間內擺脫心理陰影已經難，點知賽前仲傳出壞消息，主力前鋒兼隊長蘇爾達杜因為腳傷，今晚或者要紮住上，鋒力點都打個八折，「蝙蝠兵」想扭轉敗局近乎奢想，不如實際啲，諗吓有咩方法輸少幾球好過啦！

首回合：華客負0:2
皇馬作客恰死華倫

‧華倫近6次主場對皇馬全部開大。

‧皇馬連續4次作客贏華倫之餘，近4戰更0失球。
兩軍唔敢亂攻吼半場細

今場係皇馬連續第3場同華倫交手，上仗踢咗半場已經輸5粒嘅華倫，今晚點都應該會加強番防守，皇馬首回合揸住2球，今仗亦唔使急於搶攻，今場個「半場入球細」有1.62倍，博得過。
盃賽賽制

意盃為4強首回合、西盃為8強次回合，均採主客兩回合制，兩回合計打和即計作客入球優惠，未分勝負則於次回合後加時30分鐘，加時亦有作客入球優惠，再和就互射12碼。