車仔雪鵝湖焗攻牙煙

猪拉多纳

應付兩條戰線本已惡搞，仲要連續雪戰，車仔作客讓波擇使！英格蘭聯賽盃四強次回合，車路士輸住0比2作客「黑天鵝」史雲斯，肯定想盡快入波，但剛鬥阿仙奴搏得好盡，匆匆再戰難勝；史雲斯本季主場鬥曼聯、阿仙奴、車仔都唔使輸，今仗捧「讓球主勝」同細盤！（周四凌晨3時45分開賽）
史雲斯主場不敗率高

以波論波，車仔當然秤高過對手，但球隊於剛過去周日先惡戰完阿仙奴，下半場畀對手壓住嚟揪，成隊都搏得好盡，事隔三日就要飛到威爾斯作客，體力頓成疑問。另外，目前英倫三島天氣凍到爆，車仔上仗雪戰辛苦到暈，而今日斯旺西區得-4度，現場亦有雪落，換句話講車仔要接連雪戰，對球員的確好大負荷。預料今仗丹巴巴亞會代替費蘭度托利斯打單箭頭，而林柏特等老將能否連踢兩場硬仗？拿仁好有疑問。車仔於惡劣情況作客讓波，不宜捧場。

史雲斯本季表現有幾好，可謂有目共睹，球員於自己地頭更信心爆棚，依家手揸兩個入波，更可睇定嚟食。史軍本季聯賽主場不敗率幾達9成，對曼聯、車仔、利物浦、阿仙奴都唔使輸，睇到呢班波戰鬥力極為強勁，預料佢哋今晚以穩為先，入波唔慌多，捧「讓球主勝」外，細盤都可兼顧。