阿仙奴勢反彈

猪拉多纳

韋斯咸借查馬克要還息

英超是日有場補賽，阿仙奴喺主場同韋斯咸合演倫敦打吡，兵工廠早前畀射手查馬克過檔「錘仔幫」，有借兵之恩，今次係時候追討人情債！「錘仔幫」客場鋒力係英超最弱，與其恩將仇報，倒不如乖乖哋讓路。阿仙奴勝望高，兼有大勝本錢，可博「讓球主勝」！

（有線300及200台周四凌晨3時45分直播）

今場原本安排喺上年聖誕拆禮物日進行，但因地鐵工潮延期，隔咗近一個月再戰。冬季轉會市場重開後，阿仙奴教頭雲格進行「利益輸送」，將前鋒查馬克借去韋斯咸，兵工廠當佢係草，但現時「錘仔幫」鋒線無大將，當正佢係寶。雲帥出名算死草，借兵畀人必有所圖，正所謂得人恩果千年記，韋斯咸教頭艾拿戴斯（大Sam）喺英超打滾多年，唔會唔識做啩？
韋斯咸作客死火往績輸晒

就當大Sam想過橋抽板，韋斯咸亦唔夠火力作客起義，根據借用條例，查馬克今場唔可以倒戈，其餘箭頭方面，安祖卡路爾傷緊，邁加去咗踢非國盃，剩低卡頓高爾同華斯迪，兩條友今季加埋入得三球，用邊個都係冇料到。「錘仔幫」最大鑊係客場超低產，聯賽作客十戰入五粒，數字係英超最低，連盃賽對上五次作客都交白卷，就算回巢嘅祖高爾幾弗都無力威脅對手大門。

阿仙奴連續兩場大戰不敵曼城同車路士，連同月初和修咸頓共失八分，現已落後第四位熱刺七分，爭奪歐聯入場券形勢不妙，今戰更加唔衰得！兵工廠續有中場阿迪達養傷，箭頭阿歷士張伯倫及普多斯基上陣成疑，但前線禾確特愈戰愈勇，拍住中鋒基奧特攻堅，有條件製造一場大勝。阿仙奴近五次對韋斯咸全勝，包括首循環贏3比1，今戰可望重溫美夢。
雲格開會救亡

雲格召開危機會議叫班兵醒醒定定！阿仙奴喺賽季關鍵時期連番受挫，面臨失落來季歐聯席位，教頭雲格決定嗌晒班「廠將」開大會，再次強烈要求陣中將士挺身而出，希望可以帶領球隊走出困局。

阿仙奴以往喺大戰翌日慣咗安排球員進行輕鬆操練，畀佢哋回吓氣，大軍日前輸畀車路士後，教頭雲格罕有改為召開特別會議，佢嚴詞警告班兵，若果踢成咁下季肯定冇得打歐聯。雲帥好欣賞傷愈嘅韋舒亞場場搏晒命，但不滿有人過分倚賴隊中主將，要求眾將齊齊企出嚟撐球隊。

雲格喺兵工廠民望不斷下跌，舊帥格拉咸喺呢個時候出嚟踩多腳，直言雲帥係阿仙奴衰落罪魁禍首：「佢確係阿仙奴史上最佳教頭，但過去幾年已經失去光環，淨係睇佢簽番嚟嘅球員質素遠不及走咗嗰批，就知咁搞法唔掂啦！」