維拉頹爆博巴拉福特晉級

猪拉多纳

阿士東維拉喺英聯盃4強首回合，作客對住乙組仔卻毫無優勢，仲要輸到1:3，今晚次回合縱使有主場之利，睇怕都難阻一心締造球會歷史嘅巴拉福特躋身決賽，1.62倍嘅「客隊晉級」係信心之選。

（開賽時間：周三凌晨3:45）

首回合作客嘅維拉強陣出擊，諗唔到依然畀乙組仔巴拉福特3度憑住角球組織攻勢入波，好似食咗「懵仔藥」咁款，就算日前喺英超領先西布朗兩粒，去到尾段又試喺禁區傻吓傻吓定晒格，畀奧丹維治輕鬆起腳入波逼和，就證明「藥力」仲未過。
巴拉福特一心攻英聯盃

巴拉福特首回合「三級跳」挑戰成功，球員難免沉醉喺勝利當中，喺英乙不敵牛津聯實屬情有可原。雖然跟手喺英錦標又畀克魯大炒出局，不過同對維拉嗰陣相比，淨係得番卻迪斯告特同尼敦度爾兩件正選喺度，擺到明疊埋心水搶英聯盃，所以根本唔使擔心佢哋會有跌Watt問題。再者日前對維爾港場聯賽因為天氣問題延期，就更加係天助巴拉福特，畀佢哋養精蓄銳喺今晚搏殺，就算最壞情況輸番球，都一樣夠數躋身決賽！

首回合：維拉客負1:3
英聯盃賽制

採主客兩回合淘汰制，今輪為4強次回合，若總比數相同，會於次回合後加時作賽。加時階段增設作客入球優惠，若加時入球數字相同，客隊可取得決賽入場券，若加時沒有入球，則需互射12碼決勝。