維拉發攻祈福半場得米

猪拉多纳

英格蘭聯賽盃四強戰次回合賽事，英超護級分子阿士東維拉回師主場鬥英乙神奇球隊巴拉福特。巴拉福特首回合爆冷贏3比1，維拉今戰由開波一刻就要搶攻，務求極速收復失地，隨住箭頭艾邦拉荷復勇，佢哋有足夠火力摧毀對手後防，預計上半場已可破關殺敵，要維拉「半場主勝」！

（周三凌晨3時45分開賽）

維拉喺聖誕及新年賽期連場災難慘敗，頹勢延續至盃賽，首回合畀巴拉福特打謝，今次返主場焗攻，冇得懶懶閒。先睇維拉有乜攻擊武器，計級數戴倫賓特最高，但佢同教頭林拔唔啱key入咗雪櫃，士哥靠晒賓迪基。呢位比利時小將加盟初期唔算醒，但家陣愈踢愈有信心，喺前線硬爆威力好強。另一箭頭艾邦拉荷今季成日傷，佢擅於側擊，切入中路射門好煞食，上場弗番亦有士哥，第三圈就係靠佢梅開二度搞掂曼城，今次絕對係球隊大反擊重要棋子。
巴拉福特難頂急攻

巴拉福特表面睇嚟係一支平平無奇嘅英乙球隊，但今季喺聯賽盃展開一段神奇之旅，先後踢走韋根同阿仙奴等英超球隊，射親十二碼都贏，真係估佢唔到。巴拉福特門神杜基35歲人先嚟料，喺聯賽盃晉級過程表現神勇，首回合仲當選埋全場最佳球員，不過今次維拉實會攻得好急，佢哋得條英乙級數防線撐住，恐怕杜基頂唔到幾耐。維拉今仗贏面高，但主W被壓低至1.27倍，投X價值唔大，不如玩「半場主勝」，兼顧埋入球大，博雙殺！