雲達華治復出漢堡抵撐

猪拉多纳

紐倫堡新帥騰雞冇運行

德甲列強展開下半季征途，力爭來季歐洲賽入場券嘅漢堡會造訪紐倫堡，佢哋有中場雲達華治傷愈可候命，由佢負責派牌，前線嘅孫弘民同魯迪夫尼斯使驚冇供應？造訪由「騰雞新帥」韋辛加帶隊嘅紐倫堡唔會輸蝕，受讓平半要下盤。

（有線61、64、201及204周日晚10:30直播）

漢堡趁住歇冬期去阿布扎比舉行訓練營，雖然雲達華治友賽鬥塔斯干火車頭場波踢唔足，芬克同軍醫商量過後，亦只係決定畀佢喺今晚場德甲踢60分鐘左右，但呢位荷蘭中場尋日就拍晒心口話大腿傷患已經完全康復，踢足90分鐘都冇問題。
紐倫堡教頭跟過漢堡主帥學嘢

對家紐倫堡主場查實唔曳，歇冬前試過摸和拜仁，不過隨住教練赫基過檔禾夫斯堡，唔少德國媒體都睇死紐倫堡下半季冇運行。畢竟新帥韋辛加昔日只係執教乙組恩高斯達特同紐倫堡B隊，根本就冇德甲領軍經驗，呢位前拜仁球員喺本月頭出席加盟發布會嗰日，《漢堡晚報》仲笑佢騰雞同表情生硬，擺明未見過大場面喎！

韋辛加仲話，自從開始執教工作至今，都不斷向昔日拜仁隊友芬克偷師，今鋪徒弟想偷「師傅」雞你估咁易咩？何況守將馬高斯伊利亞斯打柴唔出得，對上5次主場鬥漢堡亦只係贏過1次咁大把，仲學人讓波？梗係捧漢堡啦！