加納人強馬壯 獵殺花豹

猪拉多纳

雖然話齊心就事成，但如果係齊心搞事，自然乜都搞唔成！非國盃B組今晚頭場上演嘅「黑星」加納對「花豹」剛果民主共和國，「花豹」大軍賽前竟然爆出傾唔掂獎金罷操醜聞，同時主帥利萊又因為唔滿意足總行政威脅辭職，總之內部立立亂，今晚想唔輸都難，加納2.4倍「讓主」夠穩陣啦！

（now676台周日晚11:00直播）
球員玩罷操　主帥鬧辭職

曾經兩奪冠軍嘅剛果民主共和國，所有威水史都已經係咸豐年前嘅事。以為佢哋今屆喺非洲名帥利萊帶領下，可以創造奇迹咩？可惜呢位曾經喺98年帶領喀麥隆贏過非國盃嘅64歲法國籍老帥，賽前兩日就以唔滿意球隊行政混亂為理由，向足總提出書面辭職。據知，利萊係不滿之前去中東集訓，球員簽證搞到甩甩漏漏，唔少人要遲嚟報到影響訓練，到依家又爆出足總同球員傾唔掂獎金，成班波罷操兩日，仲點踢好波？

雖然尋晚最新消息，利萊已公開否認唔教，即係話會繼續帶隊，但係佢同「花豹」足總嘅關係仲未搞得番掂，即使佢有球員撐腰，成班波掛住搞抗爭，備戰工夫梗係會受到影響，今鋪對住實力超班嘅加納，單靠安德列治射手馬保卡尼同前英超失意兵路亞掛帥，睇怕都係凶多吉少。
軍紀嚴明 棄用「詐傷」阿休

加納呢邊，力爭30年來嘅首個冠軍，鬥志最有保證。主帥艾卡華斯艾比亞喺月初集訓前夕，就宣布放棄徵召自稱有傷、冇嚟報到接受軍醫檢查嘅馬賽前鋒阿休進入最後名單，揸得緊軍紀，留得低嘅球員仲點會敢亂嚟。

事實上，目前世界排名26嘅「黑星」，陣內包括基恩、戴歷保定同艾爾文巴度等都曾經或者依家喺歐洲頂級聯賽搵食，踢大賽點都可以秤先一截。

非國盃B組