馬體會要踢出風格

猪拉多纳

周日西甲有2場影響到聯賽第2位爭奪嘅大戰，先有今季主場不敗嘅馬體會出戰利雲特，然後壓軸好戲有皇馬作客華倫。皇馬現時無疑大幅落後巴塞，但好好醜醜點都要攞番個亞軍，因此目標好清晰，就係要追趕馬體會，所以後者今晚一定唔敢懶懶閒。

馬體會教練施蒙尼係一個好有要求嘅教頭，佢多次表明要球隊有好成績之餘，仲要踢出風格。「主場搶攻、作客穩守再博突擊」或者就係佢哋上半季嘅主打戰術，喺施蒙尼指導下，球員亦演繹出色，令馬體會今季主場全勝，射手法卡奧上半季亦勁入18球，平咗馬體會名宿巴達沙喺1988/89球季創出嘅聯賽半程最多入球紀錄。

對手利雲特係少數上半季能夠令馬體會失分嘅球隊，但想複製首循環戰果唔容易，皆因佢哋作客麻麻，最近2場分別輸畀同級嘅華歷簡奴同貝迪斯，水準飄忽同火力薄弱係致命傷。佢哋近6場西甲4次「食白果」，今晚作客必以守行先，又睇吓有冇本事搞到馬體會老鼠拉龜。

（now632台周一凌晨2:00直播）