禾仔續約廠迷收大禮

猪拉多纳

雲格漏咗風聲話有能力買卡雲尼，阿仙奴球迷已經開心到震，如果呢件事成真兵工廠攻力就當然大增，但成事機會有幾高？小妹就笑而不語啦，大家諗拿玻里真係願意放人嘅話，歐洲各大豪門又點會放過？以阿仙奴嘅風格都冇乜可能爭得贏！所以應該實際啲，禾確特續約已經係雲格派畀廠迷嘅最佳禮物。
前途明朗 踢得更生

禾確特真係揀啱時間大爆發，一踢番正前鋒就成個球王咁，結果阿仙奴都肯畀份高價合約出嚟，造成球會、球員、球迷三贏局面！禾確特依家冇晒前途問題，自然可以喺球場上更專心有好表現。其實除咗佢之外，阿仙奴最近攻力的確唔錯，上周中足總盃雖然只靠韋舒亞入波，小贏史雲斯一球，但實際戰情係兵工廠住抽，韋舒亞、辛迪卡索拉、基奧特又夾到上晒身，要知道史雲斯都係一件硬嘢，阿仙奴都有能力全面降服佢哋，證明呢班波最近班鋒將狀態真係唔錯。

車路士經過前排段衝刺期，最近好似有所回落，大家都知贏波就好地地，但有乜差池，唔受車迷歡迎嘅領隊賓尼迪斯肯定立即有壓力，所以車路士上周中畀修咸頓摸和2比2失分後，今晚一定要全攻阿仙奴作交代。上仗車路士後防真係比較唔集中，三扒兩撥畀修咸頓連入兩球，但中前場桑馬達、丹巴巴亞威脅依然，連加利卡希爾推上前頂波都有作用，仲有伊雲洛域成日藉角球建奇功，基本上車仔嘅入球能力都唔使懷疑。入球大熱就熱啲，但最緊要有好波睇又穩陣嘛！
Kit推介：車路士 入球大