利物浦圍捕金絲雀

猪拉多纳

史杜列治加盟火力增

張峰自09年成家立室以來，好耐都未試過過單身寡佬日子，難得老婆Pecky帶咗囝囝Aiden去韓國旅行，今個禮拜一於約埋班中學波友齊齊睇吓波、回憶吓啲寡佬生活！今晚英超有利物浦主場迎戰「金絲雀」諾域治，「紅軍」今季改變踢法以地面組織為主，方向正確，史杜列治加盟後火力提升，今晚一於撐利物浦1.66倍「讓球主勝」。

（有線201及301周六晚11:00直播）
諾域治近5場聯賽不勝

雖然成日都聽到朋友講「若要生活好、咪買利物浦」，但講真一季有幾多支銀行球隊吖？其實只不過係大家對利物浦嘅要求同期望都過高啫！上半季前線得蘇亞雷斯一個孭飛，目標太大令對手容易防範，好彩史杜列治喺1月轉會窗重開後加盟，大大改善前線破關能力。雖然史杜列治加盟時間尚短，但已經貢獻咗兩個入波，只要再畀啲時間配合蘇亞雷斯同謝拉特兩位大哥，「紅軍」前景其實都幾樂觀o架！

諾域治早前係威係勢，贏完阿仙奴再贏曼聯，三兩下手勢就擺脫降班區域，不過自從贏完韋根後，已經好罕有咁一個月冇喺英超響過勝鼓，對上5場波只係攞得1分，可見近況奇差，今晚作客晏菲路都係凶多吉少，利物浦「讓主」絕對好路。
張峰來料：利物浦（讓球主勝）