曼城強襲富咸 掀「大」屠殺

猪拉多纳

阿古路傷愈 雙「斯」Show Off

迪斯高爆發＋阿古路傷愈＋泰維斯博續約，曼城今晚喺英超主場對富咸，肯定會用最強火力轟炸對手，唔憂冇波入，加上富咸專登喺足總盃收起王牌貝碧托夫留力，相信今場兩隊都會輕易撻着，1.43倍入球大咪嫌熱！

（有線200及300、廣東體育周六晚11:00直播）

曼城4大箭頭之中，以巴洛迪利最唔生性，唔識為自己前途而戰，相反「雙斯」之一嘅迪斯高就醒目得多，趁住阿古路養傷期間跑出，近4場入4球成為曼城喺英超連盃賽4連勝嘅最大功臣，由於阿古路已經好番，無論今場佢哋邊個打正選，都肯定會以入球確保個人出場時間，對上4場勁入12球嘅曼城鋒線，真係唔似會突然死火。何況連養咗傷一排嘅魯迪維爾，今場都可以踢得，「藍月亮」根本一樣人強馬壯。
落後曼聯7分不容再失

除此之外，曾經唔止一次要求離隊嘅泰維斯又突然轉性，今季佢長期打正選，心情靚番晒，距離約滿18個月就等唔切放風話想續約，據講「藍月亮」亦準備同佢簽新約至2016年，為咗加人工，睇怕「野獸」亦會出盡力咬死富咸，就算中場耶耶托尼去咗為科特迪瓦踢非國盃都唔怕，大家可以開定電視等睇入球騷。況且，現時曼城落後同市宿敵、暫列榜首嘅曼聯7分，睇怕唔會歎慢板，隨時一開波就搶錢咁搶爭取入球。
富咸貝碧 拜仁雷斯抖夠

另邊廂嘅富咸，喺足總盃加時後以2:1淘汰黑池，睇落好似贏得好辛苦，查實呢場波就專登收起貝碧托夫同拜仁雷斯，明顯係為咗儲定彈藥同曼城搏命。事實上，今季富咸遇親利物浦、熱刺、阿仙奴、曼聯同今場對手曼城全開入球大，反映佢哋對住前列分子唔會死守，再追入球大啱數！
「藍月亮」近4場由頭贏到尾

‧曼城連續4場開半勝全勝。

‧「藍月亮」近6次同富咸交手5度開入球大。

‧曼城踢22場失19球為英超最佳防守球隊。

‧富咸連續6場開半場入球細。
曼城易撻着吼1.6倍「主主」

曼城今場主勝得1.15倍，可以話完全冇肉食，倒不如改玩賠率較好分、有1.6倍嘅「主主」，畢竟曼城已經連續4場由半場贏到落尾，非常容易撻着，由於阿古路好番多數會以後備身份復出，預計會打正選嘅泰維斯同迪斯高，當然會諗辦法避免下半場被換走，咁嘅情況，相信曼城會更容易開「主主」益街坊。