實幹孖寶助禾堡高飛

猪拉多纳

財雄勢大、猛將如雲嘅禾夫斯堡，原本好應該係拜仁慕尼黑同多蒙特以外嘅德甲第3勢力，只可惜會方一直縱容混帳教頭馬加夫，呢位昔日名帥近年以買賣球員為樂（好可能係副業），令球會虛耗數之不盡嘅金錢、時間同耐性，到頭來長期喺聯賽榜淪落下游位置，會方去年底終於忍無可忍，將呢位瘟神踢走。

趕走馬加夫，並唔係換個教練咁簡單，皆因佢喺球會兼任埋經理，獨攬大權，禾堡首先以超過3倍人工，撬走喺雲達不來梅表現出色嘅忠臣K阿羅夫斯，至於教練方面，會方原本屬意名氣大嘅前德國名將舒斯達，但最終接納K阿羅夫斯建議，上月搵嚟實幹型嘅赫基，兩人聯手分擔馬加夫工作，歇冬期已初見成效。
K阿羅夫斯赫基有貨交

K阿羅夫斯買入多蒙特嘅克羅地亞球星比列錫，而赫基就喺備戰期不斷同球員溝通，熱身賽表現同成績一場比一場好，呢位主帥過去只執教過亞琛、漢諾威同紐倫堡呢啲小球會，向以戰術同提拔新星見稱，而且擁有球壇少見嘅從未被炒紀錄，佢家居距離禾堡100公里，每星期只需探望家人一次，其餘時間都畀晒球會，絕對係工作狂，以前佢喺限米煮限飯嘅小球會一樣可以就地取材做到成績，如今手上擁有超過30名一隊球員，當中仲包括迪亞高、巴斯杜斯同拿杜等球星，發揮空間更大，禾堡作出呢個轉變，Oliver對佢哋前途非常樂觀。
主場夠贏殘陣史特加

禾夫斯堡今晚會喺主場迎戰史特加（周六晚10時30分開賽），Oliver對主隊充滿信心，史特加實力次一皮，備戰工作同熱身賽表現都好一般，加上陣容不整，首席射手伊比斯域同啱啱續約嘅後防大將酒井高德雙雙停賽，左閘波卡去咗踢非國盃，加上佢哋近5次作客禾堡全敗，今仗禾堡小讓平半絕對係筍盤。
Oliver 推介：

禾夫斯堡勝 ★★★★

多蒙特上盤 ★★★

漢堡下盤 ★★★