紅軍請食私房菜

猪拉多纳

利物浦主場對諾域治，紅軍下半季演出有改善，尤其係進攻甚有睇頭。新兵史杜列治迅速融入球隊，同蘇亞雷斯擦出火花，喺晏菲路出擊，更加要做齣好戲畀fans睇，掃走上場「雙紅會」輸波衰氣。預料紅軍會強攻大炒「私房菜」諾域治，捧利物浦「讓球主勝」。

（有線301及201台周六晚11時直播）
諾域治往績輸蝕

利物浦近況唔錯，包括盃賽近十仗取得七勝三負，「海鮮味」大減，睇嚟羅渣士改革已到收成期。羅帥最近又有「德政」，簽下史杜列治，球隊以往靠晒蘇亞雷斯單打獨鬥，依家有埋呢位英格蘭前鋒幫手，可謂打通中前場任督二脈，攻擊點更多。史杜列治上仗對曼聯後備上陣即刻入波，證明物有所值。

今場對手只係諾域治，相信羅渣士將以蘇亞雷斯同史杜列治擔正攻堅，贏番場漂亮勝仗。諾域治走下坡，上仗主場都贏唔到態沉嘅紐卡素，而且諾域治近七次同紅軍交手只得一和六負，包括首循環主場慘敗2比5，今仗作客形勢更危。