史雲斯後勁凌厲 唔驚跌Watt廠仔

猪拉多纳

英格蘭足總盃第3圈重賽，阿仙奴返番主場再鬥史雲斯，兩隊都信奉地面進攻，可惜兵工廠華麗踢法不再，相反後輩史雲斯青出於藍，甚至有「英超巴塞」嘅美譽，一於支持佢哋踢走前輩阿仙奴晉級，冷敲2.67倍「讓球客勝」。

（now635台周四凌晨3:30直播）
兵工廠阿迪達缺陣影響大

曾幾何時阿仙奴以行雲流水嘅進攻稱霸英超，可惜近年淨係識得喺對手禁區外圍猜波，成日製造唔到入肉攻門。今晚中場阿迪達養傷，冇咗呢位擅於掌握攻守節奏嘅中場派牌，替補嘅韋舒亞同艾朗藍斯火候始終爭啲，阿仙奴今場嘅組織力必大打折扣。最大問題係廠仔仲有中堅哥斯尼停賽，由梅迪薩卡頂上，呢位德國中堅高大硬淨但靈活欠奉，面對打法機動嘅史雲斯隨時成為缺口。

史雲斯今季喺米高盧特立帶領下，除咗保持流暢攻勢外，球員嘅爭勝心亦增強咗。今季佢哋已多次喺比賽末段入波，包括上場足總盃尾段入波追和博得重賽機會，聯賽作客又試過臨完場絕殺兵工廠，心理上當然有優勢。況且佢哋早前作客打低車路士令士氣高漲，就信佢哋今晚長江後浪推前浪，推冧兵工廠。