「新魔獸」食過翻尋味

猪拉多纳

車路士「新魔獸」丹巴巴亞早前喺英格蘭足總盃處子登場玩謝修咸頓防線畫面歷歷在目，兩軍話咁快又喺聯賽碰頭，車仔今次由作客變主場，優勢更加明顯，預期丹巴巴亞可以再次摧毀敵軍後防，蘇豪熱捧「讓球主勝」！

（有線300及200台周四凌晨3時45分直播）

丹巴巴亞加盟車路士冇耐已經贏盡球迷歡心！冇計啦，呢個當旺射手兩次擔正攻堅，車仔全勝轟入九球，先喺月初足總盃梅開二度助球隊大炒修咸頓5比1，上場亦以4比0打破史篤城主場不敗身。雖然丹巴巴亞對住史軍冇士哥，但佢撞到敵軍球員慌失失兩度擺烏龍，作用明顯；反觀「王子」費蘭度托利斯喺聯賽盃擔大旗對史雲斯輸埋，表現完全唔及「新魔獸」，睇怕「王子」都可以安心坐冷板。車仔續有尼日利亞兵域陀摩西斯同約翰米基爾備戰非國盃缺陣，但影響唔算大，最緊要係有兩個天才中場夏薩特同桑馬達支援丹巴巴亞，肯定大把數胡餐士。
「聖人」防線慌失失

修咸頓對上四場聯賽不敗，包括上仗喺護級大戰作客贏阿士東維拉，演出有進步，射手列基林拔近四場聯賽入三球，但當中有兩球係十二碼，今次大軍作客史丹福橋球場實捱打，偷雞機會好微。「聖人」中前場人腳唔曳，但後防係佢哋最弱一環，近期中堅荷西方迪受傷休戰，除咗喺死球時少咗個人助攻之外，最大鑊係要搵凱維特頂上，呢位仁兄季初甩漏超多，實力見晒底只係普通貨色，上次對維拉冇出事只係對手攻力弱，今次遇上弗爆射手丹巴巴亞，恐怕佢會再成球隊負累。

自從賓尼迪斯接手後，車路士喺主場六戰錄得兩勝兩和兩負，近兩次主場出擊同樣輸波，不過佢哋一係唔贏，一贏實炒到大大鑊，兩場主場勝仗包括喺歐聯6比1狂數洛斯查蘭特，以及於聯賽8比0擊潰阿士東維拉，今場齋Ｗ冇投X價值，若果大家都覺得車仔贏得，不妨玩埋「讓球主勝」啦！