皇馬C朗復出 捕殺蝙蝠兵團

猪拉多纳

聯賽投降專注爭西盃

半季落後18分，皇家馬德里睇怕要面對現實喺西甲投降，呢個令人難以置信嘅差距，更加係「寸王」莫連奴執教生涯最差成績。好在皇馬今晚喺西班牙盃8強首回合主場對華倫西亞，C朗坐完波監可以復出，既然皇馬聯賽冇得追，西班牙盃梗係要踩行油開1.67倍「讓球主勝」！（now632台周三凌晨4:00直播）
半季落後18分創莫帥最差

無論執教波圖、車路士抑或國際米蘭，莫連奴都做慣大贏家，聯賽半季落後18分咁嘅場面，佢嘅12年執教生涯從未面對過。根據調查，現時有41.8%皇馬會員認為應該炒咗莫連奴，非常唔畀面，依照「寸王」惟我獨尊嘅性格，就算佢真係唔想撈，都唔會願意輸到趴地走人嘅，何況拎番個西班牙盃，嚟緊搵新老細都容易啲吖！

經過連續兩場保持清白，西班牙傳媒話莫連奴態度開始軟化，有可能喺今場繼續重用同佢擘晒面嘅門將卡斯拿斯，避免「銀河鑑隊」真係沉沒，咁講法贏面又大好多，就算後衞沙治奧拉莫斯要坐波監都唔怕。再講，C朗停賽1場後，餓完波肯定會搵人祭旗，要知道皇馬上場對奧沙辛拿，冇佢即刻食白果，今場冇可能再失威！
C朗在陣勝率高達75%

翻查戰績，C朗加盟後上陣172場，皇馬有129勝24和19負，得勝率達到75%，期間攻入174球，入球數字佔全隊39%，邊個擋到佢？另一方面，華倫近8場有7勝1負，近況的確好順，但佢哋嘅首要目標係收復聯賽失地，確保可以踢下屆歐聯搵錢，之前喺西班牙盃根本冇用最強陣容應戰，咁嘅情況遇到卡斯拿斯同C朗，隨時變炮灰。
西盃賽制

8強採兩回合主客制形式進行，兩回合計入球較多一方晉級。若雙方入球數目相同，採作客入球優惠。若仍未能分出勝負，於次回合後即加時30分鐘。若加時沒有入球，即互射12碼決勝負。
後防甩漏多半場大有計

皇馬今季表現下滑，主要係後防唔掂，但正因為咁，有佢哋嘅比賽入球就更加容易出現。睇番對上9場主場賽事，原來皇馬有7次開半場入球大，非常容易撻着，既然教頭莫連奴同王牌C朗谷埋成肚火，呢場主場對華倫西亞要完半場前入夠兩球收錢，應該唔難，假如冇興趣玩「讓球主勝」，簡單啲玩半場入球大可能仲過癮。
皇馬主場硬淨

‧計埋西甲同盃賽，皇馬今季主場不敗得12勝3和。

‧皇馬今季喺自己地頭場均入3球。

‧華倫近10場3次半場領先、7次打和。

‧華倫連續4場至少攻入2球。