華簡下盤強襲畢爾包

猪拉多纳

今晚西甲有場獨腳戲由畢爾包對華歷簡奴，昔日巴斯克雄師畢爾包今季大跌Watt，以往主場比賽連巴塞隆拿同皇家馬德里都要退避三分，但今季已經冇呢支歌仔唱，球隊最大問題係攻力欠奉，踢咗半季有多只入得廿二球，連歇冬前一仗更錄得兩連敗。相反華簡有打不死精神，現已進駐第七位，並且聯賽三連勝，今仗受讓半一真係筍到爆，下盤必捧。

（周六凌晨4時30分開賽）
畢爾包傳聞多損士氣

畢爾包原本擁有質素不俗球員，但轉會傳聞無日無之，影響士氣，其他球員唔講，淨係洛蘭迪跟唔同豪門扯上關係，令佢無心戀戰，今季只為球隊入過兩粒咁大把。畢爾包呢排入波來來去去都係阿度里斯，冇咗洛蘭迪呢把尖刀，攻力當然受損，直接影響球隊表現。

華歷簡奴今季表現有大幅改善，雖然後防仍然唔算好穩陣，但中前場球員夠膽同人攻，今季作客亦有代表作，曾經落後馬德里體育會0比4，於最後八分鐘連入三球追到3比4，12月更以1比0作客擊敗華倫西亞，今仗畢爾包對華歷簡奴嚟講唔算乜嘢大老虎，受讓非常着數。仲有一樣值得一提，華歷簡奴今季踢18場聯賽只和過一場，扒冷嘅朋友可以一試3.85倍客W。