祖記主場攞Ａ

猪拉多纳

聯賽中伏 意盃補飛

意大利盃八強重量級對決，祖雲達斯主場對AC米蘭。剛於周日進行過意甲，祖雲達斯以一比二輸畀十人應戰兼作客嘅森多利亞，演出令人極之失望。但正如教練干地所講，落敗並非世界末日，輸波對於一支長期領前嘅球隊反而有警惕作用。祖記已經上咗寶貴一課，相信今後不敢再大意，巨高認為1.57倍主W值得捧場。

（now 633及660周四凌晨3時45分直播）

祖雲達斯聯賽失利，陣容不整係其中一個原因；當日前鋒胡仙歷及中場維達爾都未有正選上陣，加上右翼列治史迪拿停賽，陣容欠完整失分可理解。今場意大利盃面對勁敵AC米蘭，相信上述三位主力都會復出。

另外要留意係馬田卡沙利斯，去季雙方亦曾於意大利盃碰頭，呢名烏拉圭守衞就曾兩度攻破AC大門，呢位福將時有神來之筆，屬祖記爭勝本錢之一。
AC重建期實力次一皮

AC啱啱喺聯賽贏錫耶納二比一，但取勝過程相當辛苦，球員狀態未必好得過祖記，尤其是有「小法老王」之稱嘅艾沙拉維，積極性比起上半季似有多少下滑。另外奇雲保定最近受到種族歧視事件困擾，心情欠佳又點能夠踢好波呢！

實在今季嘅AC仍處於重建階段，實力同祖記比較仍差一截，今場作客就更加不容樂觀，一於捧主勝。