車仔狂轟黑天鵝

猪拉多纳

盃賽好大喜攻

車路士喺英格蘭聯賽盃四強戰首回合主場迎戰「黑天鵝」史雲斯，車仔今季喺盃賽例必大踢進攻足球爭勝，超過九成盃賽開大，大軍簽埋「新魔獸」丹巴巴亞後鋒力激增，今次將會繼續狂攻爭勝，大盤有1.57倍屬投X首選！

（周四凌晨3時45分開賽）

車路士今季喺盃賽踢得勁開放，不論主場、作客定中立場，一律有前冇後打死罷就，計晒社區盾、歐洲超級盃、歐聯、聯賽盃、世冠盃及足總盃，佢哋本季盃賽十四戰十三場開大，只得世冠盃決賽對哥連泰斯失準輸波兼開細，近兩次出戰盃賽作客列斯聯及修咸頓同樣大勝五比一，正氣到不得了。
丹巴巴亞火速顯射手本色

車路士啱啱喺紐卡素簽下星級射手丹巴巴亞，呢個塞內加爾球星剛戰修咸頓首度登場即梅開二度，佢同域陀摩西斯踢落非常合拍，同一班隊友好似完全唔使夾咁，真係犀利！隨住丹巴巴亞來投，另一箭頭費蘭度托利斯唔可以再懶懶閒，今次無論派出邊個前鋒落場，佢哋都會去盡爭取士哥。

另一邊廂，史雲斯上場喺足總盃主場惡戰阿仙奴，最終同對手踢成二比二，消耗唔少體力，匆匆作客再戰好惡踢。不過，史雲斯前線有個超級射手米捷在陣，而且反擊速度快，始終都有入波本錢，預期今戰會同對手合演入球騷，1.57倍大盤值得捧場。