阿仙奴夫添搶盃擒天鵝

猪拉多纳

史雲斯留力鍊車收起米捷

英格蘭足總盃第3圈大戰今晚接力上演，「天鵝」史雲斯喺主場迎戰阿仙奴，受讓都冇着數。事關史雲斯要留力喺聯賽盃4強首回合對車路士，相反兵工廠喺聯賽盃恥辱性出局後，講明會排最強陣應戰，力保本土最後爭標希望，2倍客W抵捧！（now633及660台周日晚9:30直播）

記得阿仙奴喺聯賽盃對乙組仔巴拉福特，強陣出擊竟然被掃走，搞到掀起一片反雲格潮，而且元旦日同修咸頓踢成1:1後，兵工廠今季已經有12次因為低級失誤失波，屬於英超最差數據。同時今季20場得34分，創出球會近7年最低分數，至於2012年得18場聯賽勝仗，更加係雲格執教後最差成績，衰到難以想像！
足總盃雲格最後救生圈

由於聯賽同歐聯爭標機會渺茫，阿仙奴當正足總盃係救生圈，雲格話完全冇留力嘅打算，即使改變正選陣容，都只係因為有其他球員更值得重用，絕對唔會亂出新仔。當中英國傳媒話贊堅臣會代替沙格拿打右閘，防線可能仲穩陣啲，始終沙格拿傷愈後好似變成另一個人，周時蝦碌好似專登想被賣走咁。
史雲斯捱完快車散散哋

另一方面，史雲斯正選陣容的確唔錯，弊在後備力量唔掂，佢哋捱完聖誕、新年快車賽程得1勝3和，估計部分球員已經散散哋，呢場仲話可能收起王牌米捷同後衞安祖蘭基，心態上似乎係想犧牲足總盃，寧願全力博喺聯賽盃拆「車」算數，對家兵工廠嘅禾確特呢期踢到好似亨利上身，淨係靠速度都已經恰到腳軟兼留力嘅史雲斯啦！
史雲斯半場多和波

‧史雲斯近6場半場1次領先、5次打和。

‧史雲斯近19次足總盃對同級對手，只得4場勝仗。

‧阿仙奴對上1次無法躋身第4圈係1996年。

‧兵工廠近17場得2次冇波入。
廠仔多射手博第一隊入球

米捷到底對史雲斯有幾重要，應該唔使多講，既然英國傳媒話領隊米高盧特立睇重聯賽盃多啲，好可能會收起佢留力對車路士，今場史雲斯對阿仙奴應該唔容易入波。咁講法，當然係捧1.69倍兵工廠「第一隊入球」着數，畢竟阿仙奴進攻球員夠晒多，萬一唔能夠打破僵局，都有射手基奧特可以後備入替，先開紀錄機會好高。

猪拉多纳