紅軍着火開大餐 二線兵放懷攻非聯賽隊

猪拉多纳

紅軍已徹底變為全攻型球隊，長追大盤係最佳投X選擇！英格蘭足總盃第3圈賽事，利物浦作客非聯賽球隊曼斯菲，一班攻擊手又係「開餐」時候；主隊難得對住紅軍，又有電視直播，守嚟無謂不如放開嚟踢，大細中位數調升到3.5球，照捧大！（now 633及660周一凌晨零時直播）

無論於杜格利殊、鶴臣，甚至賓尼迪斯或侯利亞時代，紅軍都係守強攻弱，打法充滿戰術性，力求穩守再打快速反擊，係紅軍多年打法基調。但現任領隊羅渣士，已將球隊完全改變，主攻打法同前領隊伊雲斯時代頗為相似，對入球嘅渴望極大。近期紅軍入球停不了，蘇亞雷斯腳風順到嘔，就算今仗唔打正選，預計都會擺喺後備等候搏殺，而新將史杜列治，亦或會坐於後備席。

羅帥應會以應付歐霸盃嘅陣容，去設定今仗首發人選，相信近期較少上陣嘅舒維爾、蘇索同祖阿倫等會正選落場。唔好睇小呢班「二線兵」，本季佢哋踢歐霸六場分組賽、兩場英聯盃，除鬥死守安治同作客烏甸尼斯外，其餘賽事全數開大，得一場總入球數唔夠四球，今次對手得鋪牛力，又點守得住紅軍？
曼斯菲但求轟轟烈烈

今場無論客勝同讓球客勝，賠率都低到無味，根本冇投X價值。曼斯菲唔知要再等幾耐，先鬥到名牌球隊，喺電視直播下一定施展渾身解數，轟轟烈烈同紅軍打一場，一場入球騷出現在所難免。