二線紅魔扑錘開「讓和」

猪拉多纳

足總盃第3圈今晚開戰，最養眼嗰場肯定係韋斯咸對曼聯！計牌面同近況，「紅魔鬼」當然勝一籌啦，不過兩個禮拜要踢5場波，你估班球員鐵打o架咩？領隊費格遜講明會畀部分主力歇一歇，今仗造訪近期動作多多兼主場硬淨嘅「錘仔幫」唔似會一面倒，預計曼聯頂多小勝，3.5倍「讓球和」好路。（now633及660台周日凌晨1:15直播）
費Sir親證收起艾拉卡域克

據曼聯官網報道，費爵爺親口證實會喺今仗收起左閘艾拉、中場卡域克同史高斯，尹佩斯同朗尼亦未必踢，取而代之會由阿歷山大畢拿、湯卡華利同傷愈冇耐嘅香川真司擔正，話就話半力出擊，但呢班所謂副選兵都係國腳級人馬，戰鬥力點計都仲喺韋斯咸之上。

唔係話「錘仔幫」屎波，不過呢支倫敦球隊近9戰贏得嗰兩場，橫睇掂睇都唔似會偷到曼聯雞。為咗走出近期困境，兼且為爭歐戰資格打好個底，領隊艾拿戴斯呢排係咁斟猛人，先後羅致咗舊將祖高爾同「愛爾蘭美斯」施恩麥佳亞，不過咁喎，祖高爾今季喺利物浦坐多過踢，能唔能夠即刻幫到手，真係令「比利仔」好懷疑囉。
韋斯咸主場衰極有個譜

最弊係「錘仔幫」近排啞晒火，安祖卡路爾要到月底先復操，卡頓高爾又陷入球荒，韋斯咸好多時都要靠麥克盧保同路蘭兩位中場後上入波，火力信唔過。之不過韋斯咸上月頭試過爆冷砌低車路士，最近對住「利市雙雄」亦只係僅輸2:3、1:2，主場出擊衰極有個譜，照計唔會輸得太大鑊。既然「紅魔」個1.55倍客W冇乜肉食，一旦佢哋落後又9成開大，搞到個入球大細冇路捉，呢場波都係冷吼3.5倍「讓球和」最划算。

英總賽制：今輪為英格蘭足總盃第3圈賽事，如法定時間內賽和不設加時，擇日重賽。
韋斯咸輸慣1粒

‧曼聯對上6次喺英總造訪英超隊伍有4次贏波。

‧雙方上次喺英總交手曼聯主場贏6:0。

‧韋斯咸近4場敗仗都係輸1粒。